La Fondasion

Fondasion de la Asosiasion

La Asosiasion de los Reskapados de los Kampos de Konsentrasion Orijinarios de Grecha ke biven en Israel fue fondada al Marso 1953. Esto era dies anyos despues de la eksterminasion de los Djudios de Grecha i de la destruision se sus komunidades – ke la prinsipala d’entre eyas era la Komunidad de Saloniki, ke arresvio durante el tiempo los titolos de “Sivdad-Madre de Israel” i “Yerushalayim del Balkan” – i ocho anyos despues de la liberasion de los aprezados en los kampos de konsestrasion.

Los fondadores de la Asosiasion fueron: Avraam Tsarfati, Yosef Kalamaro, Shemuel ‘Harari, Haim Aruh i David Haim, en Ganeden k’esten!

Los fondadores ovraron veluntariamente kon determinasion, devuamiento i enerjia para realizar la idea ke konsevieron poko tiempo antes, i esto malgrado las kondisiones difichiles en la kualas se topavan. Esto se pasava, se deve akodrar, pokos anyos despues de la fin de la Gerra de Independensia de Israel. Los fondadores i la mayoridad de los ke iyan a devenir mas tadre los miembros de la organizasion – los reskapados de los kampos kon el numero al braso – se avian instalado en la Tierra de Israel desde el 1945, i fina la fondasion del Estado de Israel al 1948, avian partisipado a la gerra i se topavan dainda en medio del procheso de absorbsion. En akeyos anyos este procheso era muy difisil, visto ke el ayudo de la parte del Estado era minimal, i kada uno i uno devia de okuparse el solo de si mizmo i de su famiya, i de solver sus problemas a kuanto ke puedia.

Los prezidentes de la asosiasion durante los anyos fueron Moris Moshe (1954-1984) i Raul (Yom-Tov) Saporta (1984-2001). Suvre la direksion aktuala de la Asosiasion – mirad en la parte “Institusiones”.

Las exekutivas elejidas de la Asosiasion, dirijidas por sus prezidentes, reusheron a adelantar los butos de la Asosiasion. Uno de los mas grandes alkansos fue de propajar el fakto, ke tambien Djudios Sefaradis fueron eksterminados durante la Shoa.

Share:
  • Print
  • Digg
  • StumbleUpon
  • del.icio.us
  • Facebook
  • Yahoo! Buzz
  • Twitter
  • Google Bookmarks

Comments are closed.